Управувањето со градежното земјиште е многу важен и одговорен процес и доброто менаџирање со него, ќе резултира со привлекување на инвеститори,  со што се подобрува економската слика на општините и се зголемува економскиот раст на Македонија.

Ова го изјави министерот за транспорт и врски Миле Јанакиевски за време на вчерашниот состанок со работната група,  на која се расправаше за законот за градежно земјиште. На состанокот покарај претставници на Министерството за транспорт и врски, присуствуваа и претставници на ЗЕЛС, УСАИД и градоначалници од повеќе општини.

Во рамки на дебатата било потенцирано дека Владата ја донела одлуката за доделување на државното градежно земјиште на општините и дека во следниот период ќе изготви предлог за нов Закон за градежно земјиште.

-Во новиот Закон целосно ќе биде опфатена постапката, начинот на давање на земјиштето под закуп или  неговото отуѓување. Исто така при изготвувањето на Законот ќе се внимава да се опфати и обуката на општинските службеници кои ќе менаџираат со земјиштето, односно тестовите кои треба да ги поминат за да стекнат лиценца за извршување на оваа дејност, како и  роковите и начинот на кој ќе биде објавено земјиштето во печатените медиуми–  објасни  министерот Јанакиевски.

Тој нагласи дека при  имплементирањето на новиот закон општините ќе ја имаат целосната подршка од страна на Владата и Министерството за транспорт и врски.

OhridNews
Извор: “Макфакс”