Како што објасна раководителот на Секторот за урбанизам, Бранко Арнаудоски, со нацрт- планот за Ривиера предвидени се неколку нови објекти. Еден од нив на просторот наспроти објектот на Македонски телекомуникации. Станбени објекти со висина – приземје и три ката се предвидени на местото од сегашниот паркинг простор кај Ривиера каде со денационализација на сопствениците им е вратено дел од земјиштето. Ќе се гради и пред дирекцијата на Охридско лето, а на локацијата од летната бавча од Центарот за култура е предвидено да се гради катна гаража. Предвидени се и подземни гаражи кои би имале капацитет од 500 паркинг места.
Што се однесува на опфатот Табана, Арнаудоски објасна дека наспроти бројните шпекулации во јавноста дека на овој опфат е предвидена изградба на на висококатни објекти, со нацрт планот предвидена е градба на објекти со максимална висина од П+2, вклучувајќи го и просторт кај Летница.
– Сакам да нагласам дека и во однос на двата нацрт- урбанистички планови се постапувало согласно добиените заштитно- конзерваторски основи, изработени од Завод и музеј- Охрид, рече Арнаудоски.
Од страна на советникот Томислав Тунтев беше потенцирано дека со оглед на фактот дека станува збор за атрактивен дел од градот, треба сериозно да се разгледаат примедбите и предлозите од граѓаните кои ќе можат да се изјаснат по нацрт- плановите на јавната расправа која наскоро ќе биде организирана.
За нацрт- плановите за Табана и Ривиера советниците расправаа и на седницата во месец февруари годинава, кога не беа усвоени од мнозинството советници. Против гласаа советниците од ВМРО- ДПМНЕ, кои тогаш изјавија дека нема да поддржат урбанистички решенија кои се против интересите на градот и охриѓани и кои би се донеле без потребното позитивно мислење од страна на НУ Завод и музеј- Охрид, задолжени за изработка на заштитно- конзерваторските основи без кои согласно Законот за културно наследство, не може да се носат урбанистички решенија за старото градско јадро.
