Утре, 15-ти август, со почеток од 17 часот, Охридското Езеро повторно ќе биде местото каде што брзината, тимската координација и креативноста ќе се спојат во една поинаква трка … со педалинки!
Red Bull Педалинка, во склоп на Ohrid Water Festival, по трет пат пристигнува на старото пристаниште во Охрид, каде тимови од четворица ќе се соочат во динамичен натпревар со педалинки, исполнет со брзи пресврти, директни дуели и забавни предизвици.
На изминатите две изданија, публиката беше сведок на одлична тактичка спремност на тимовите, екстра креативни тимски маски и борбеност кај сите натпреварувачи. Форматот на оваа уникатна трка ги предизвикува учесниците што побрзо да стигнат до целта, каде двајца од тимот напред вртат на педали, а другите двајца веслаат на колена од задниот дел на педалинката.
Учеството на натпреварот е без котизација, а потребен е тим од четворица полнолетни учесници, каде барем еден во тимот е од спротивен пол.
На третото издание на Red Bull Педалинка, како и секоја година, тимовите ги очекуваат награди за прво и второ место. Покрај натпреварувачкиот дел, тимовите исто така повторно имаат можност да ја покажат и својата креативна страна, натпреварувајќи се со тимски маски, со кои влегуваат во игра за избирање на наградата ‘најдобра тимска маска’, велат организаторите.
Пријава и сите информации во врска со Red Bull Педалинка на линкот.
OhridNews
