Несовесноста и самоволието се најголемиот проблем со кој се соочуваме како заедница, реагира Антонио Додевски од Планинската спасителна служба Охрид и АК „Патагонија“ по последните случување во НП Галичица каде несовесното одгледување на говеда резултира со уништување на поставената инфраструктура за посетителите и љубителите на природа. 
Ваквото однесување на стопанот претставува вандализам. Дали некој со намера ќе ги искрши клупите и масите, ќе расфрла отпад во околината, ќе истури градежен шут или ако сакате ќе предизвика и пожар, е еднаков вандализам, како и несовесното одгледување кое предизвикува директна штета на поставената инфраструктура, но и многу поголем страничен ефект за посетителите, кои на крајот од денот, по платена влезница во Националниот парк, си одат разочарани од глетката. Заклучокот е дека паркот не си ја работи работата, иако ренџерите пред само 2-3 седмици, ги санираа летниковците, ја покосија тревата и го исчистија местото, вели Додески.
Воедно, посочува дека дојдено е време, националните паркови покрај приходот од влезници, да започнат со инкасирање и на приход од глоби.
Доколку ваквото однесување на поединци остане неказнето, тоа само ќе охрабри други несовесни или криминогени структури да прават и поголеми штети. Наша обврска како граѓани е што погласно да реагираме и бараме од надлежните да ги санкционираат ваквите примери, само така ќе покажеме дека ја сакаме природата и нема да дозволиме своеволие, кое пред очи ќе ни ја одзема. Да не се плашиме само од пожарите, бидејќи и тие се резултат на вакво и слично самоволие и несовесност, треба отворено да им се спротиставиме на несовесните, додава Додевски.
Реагираше и Ѓуро Јовчески од НП Галичица кој вели самоволието на сопственик на стадо крави, кои се патем многу корисни за екосистемот ако се чуваат прописно, доведе до уништување на претходно уреденото место за одмор и рекреација.
До кога поединци континуирано ќе го уназадуваат и уништуваат НП Галичица. Крајно време е да се стави крај на ова самоволие, потенцира.
Н.С.Ј.
