ГРК Охрид загуби од Вардар 26:28, во дерби натпреварот од 14 коло во Супер лигата, што се одигра вечерва во салата „Билјани извори“ која беше исполнета до последно место.
Вардар имаше водство во текот на мечот, а Охрид кој настапи без неколкумина повредени и со уште неколку болни и повредени играчи резултатски се враќаше во игра, но не успеа да го сврти мечот, на што влијаеше лошиот ден на голманите, што го потенцира и тренерот на домашните Борис Ројевиќ.
Прва и основна работа е што не може да се добие ваков дерби меч со само 5 одбрани. Во секоја ситуација кога се доближувавме до противникот ни требаше да се врзат неколку одбрани, но момците денеска немаа ден. Друга работа за која малку се знае Јагуриноски играше со температура, Ѓуќиќ и Ојлески играа под лекови и не можеа да тренираат оваа седмица. Не е алиби, но не можевме квалитетно да ги одработиме тренинзите за овој меч, а тука е силата на Вардар. Мислам дека можемне и повеќе и подобро, истакна стратегот на Охрид Борис Ројевиќ.
Крилото Дарко Ѓуќик, пак, смета дека играчите на Охрид сами го одлучиле мечот.
Во некои моменти не бевме на потребното ниво и во одбраната и во нападот. Честитки на Вардар за победата но сметам дека сами загубивме. Првенството е долго и сигурен сум дека може да напредуваме во секој поглед, истакна Ѓукиќ.
„Рибари“ и на овој меч беа осмиот играч на Охрид, а објективната охридска публика изрази големо незадоволство од делењето на судиската правда, за што говори фактот дека судиите по завршувањето на мечот беа испратени со свирежи.
Најефикасен во редовите на Охрид беа Стрмљан и Ѓукиќ со по 5 гола, кај Вардар незадржлив вечерва беше Хориха кој постригна 9 гола.
Статистика ГРК Охрид: Пилповиќ,Блажески, Стрмљан 5, Ојлески 1, Јагуриноски 1, Иванковиќ 4, Кукуловски, Крсманчиќ 5, Шипинкоски, Ристески, Тасески 1, Реј, Савревски 1, Лијапис 3, Петриќ, Ѓукиќ 5.
Фото галерија:
Во следното коло ГРК Охрид ја пречекува втората екипа на Еурофарм Пелистер.
Г.М.
Фото: А. Момироска
