По повод големиот верски празник Богојавление Водици голем број верници утрово се упатија во црквите на богослужбите.
Богослужбите во охридските парохиски цркви почнаа во 7 часот наутро. Централната богослужба е во цркавата Успение на Пресвета Богородицa – Каменско, со која чиноначалствува неговето високопресвештенство, Митрополитот на Дебарско-кичевската епархија, господин Георгиј.
На одбележувањето на христијанскиот празник Богојавление – Водици, во Охрид и во Струга присуствува и претседателката Гордана Сиљановска-Давкова.
Посакувам празникот да ни донесе радост во срцето, светлина во душата и мир во умот. Верувам дека осветувањето на македонските води ќе ни помогне да ги надраснеме малодушноста и летаргијата, и ќе нè инспирира на добродетелство и на грижа за блиските и за заедницата. Само со благост, внимание, солидарност и емпатија можеме да го разбудиме божественото во себе, покажувајќи ја вистинската човекова природа. Свесни дека човештвото е соочено со длабока криза и со тешки искушенија, мора да почнеме да се менуваме себеси, ако сакаме да го промениме општеството. Само морални и мудри индивидуи создаваат силни заедници чии напредок и благосостојба никогаш не се на сметка на туѓата болка и страдање. Да се радуваме што постоиме, да го цениме и да го почитуваме она што го имаме, материјалните и духовните богатства да ги споделиме со другите. Сплотени да се обидеме да придонесеме за среќна и пристојна сегашност, и благословена и просперитетна иднина, вели претседателката Сиљановска-Давкова.
Литиите од трите цркви „Св. Никола- Геракомија“, „Успение на Пресвета Богородица – Каменско“ и „Св. Георги од Горна Влашка Мала ќе се сретнат на плоштадот Св. Климент Охридски неколку минути пред 10 часот и ќе се упатат на пристаништето.
Во 10 часот ќе се одржи голем Богојавленски водосвет и ќе се положи Светиот крст во водите на Охридското Езеро.
OhridNews
