Со слетување на првиот авион на Ер Србија на охридскиот аеродром пречекан со воден мост беше означен почетокот на сезонските летови Белград-Охрид-Белград кои ќе летаат четири пати неделно, односно секој понеделник, среда, петок и сабота.

Оваа линија е во тајминг кога само ги потврдуваме одличните реалции со нашиот сосед Република Србија, кога во рамките на иницијативата Отворен Балкан создаваме низа на погодности за нашите и за српските граѓани и земјите ги доближуваме до регионалната економска соработка и унапредување на слободата на движење на луѓе и добра, истакна министерот за транспорт и врски Благој Бочварски.

Оваа авиолинија има за цел исто така да овозможи туристичка промоција на Охрид и охридскиот регион. А Охрид како најголем туристички центар во Северна Македонија има огромен потенцијал да прими нови туристи и да ги покаже сите свои историски, културни знаменитости и туристички потенцијали. Затоа Охрид е многу важен и затоа нашите политики се во насока на обезбедување на негов забрзан развој. Од друг аспект многу пати говорам дека охридскиот аеродорм се уште има добри капацитети кои можеме да ги користиме и ова е добра можност тоа да го докажеме преку воспоставување на нови линии. Владата на Северна Македонија преку Министерството за транспорт и врски континуирано создава услови за влез на нови авиокомпании кои ќе овозможат поголема мрежа на авиолинии до повеќе дестинации за нашите граѓани. Веќе ја реализираме тригодишна програма со вкупни финансиски средства од околу 5 милиои евра за воспоставување на нови линии. Низ годините докажуваме дека заедно со нашиот партнер ТАВ, умееме од Скопје и од Охрид да направиме атрактивни дестинации и засега бележиме огромен успех. Тоа го докажуваме преку континуираниот раст на патници. Оваа година сме на добар пат да оствариме нова рекордна бројка на превезени патници и тоа е само показател на нашите заеднички заложби за развој на авиосообраќајот во земјава, додаде Бочварски.

Генералниот директор на ТАВ Македонија, Неџат Курт истакна дека овие сезонски летови на кои ќе оперира Ер Србија ќе го поврзат Охрид со прекрасниот Белград што означува голема пресвртница со четири лета неделно.

Одлуката на Ер Србија дополнително придонесува за зголемени операции во текот на летната сезона на охридскиот аеродром и додава голема вредност за туризмот во Охрид и околината. Со четирите неделни летови оваа рута ќе има ефект врз севкупниот раст на охридскиот аеродром и регионот и ќе биде уште поатрактивна опција и избор за туристите од Србија кои ќе може да пристигнат со авион во Охрид за само час и половина, што е пократко, побрзо и полесно патувањето за разлика од патувањето со автомобил како што покажуваат и многу истржувања. Од друга страна луѓето што живеат во Охрид и во околината ќе имаат одлична можност да отпатуваат во Белград и да ги откријат убавините и на тој град. Ние како ТАВ аеродромски оператор сме убедени дека ова повторно воведување на летовите Ер Србија на релација Белград-Охрид-Белград ќе им користи не само на патниците кои патуваат за одмор, туку и ќе го олесни економскиот раст, културната размена меѓу блиските соседи Србија и Северна Македонија, додаде Курт.

Директорот за комерцијални работи и стратегии на Ер Србија, Бошко Рупиќ истакна дека оваа линија е од големо значење и за Северна Македонија и за Србија.

Мислам дека термините се добри за туристите. И тоа што уште сега го гледаме по бројот на резервации за целата летна сезона, голем број патници од Србија ја користат оваа линија за Охрид, така што може да се очекува раст од наши туристи. Но, исто така гледаме и голем број на транзитни патници кои преку Белград, користејќи ја нашата мрежа дали кон Северна Америка или Западна Европа патуваат преку Белград и ја користат оваа линија за Охрид. Ова всушност е нашата втора дестинација во Северна Македонија, покрај Скопје. Моментално линијата покажува добар резултат и искрено се надевам дека оваа линија ќе постане традиционална и дека ќе се видиме и следната сезона, додаде Рупиќ.

Авионските билети за оваа обновена авионска линија се во продажба и може да се резервираат на веб-страницата на Ер Србија, https://www.airserbia.com/en/destinations/flights-to-ohrid, како и на мобилната апликација на Ер Србија, достапна и за Android и за iOS.

Фото галерија

Н.С.Ј.

видео: Б. Стојаноски

фото: А. Момироска