Голем број верници, граѓани, меѓу кои и познати личности од јавниот и политичкиот живот и туристи, присуствуваа на централната велигденска богослужба во Охрид, што се одржа во манастирот посветен на Св. Климент и Св. Пантелејмон на Плаошник. Точно на полноќ митрополитот Дебарско – кичевски, г. Тимотеј, кој чиноначалствуваше со празничната литургија  ја соопшти радосната вест за воскресението Христово.


Верниците ги исполнија и другите  православни храмови во градот каде исто така се служеше велигденска литургија. Отец Љупчо, свештенослужител во црквата Света Богородица – Каменско, објаснувајќи ја симболиката на празникот  истакнува дека Велигден е празник над сите празници затоа што тогаш се слави победата над смртта, кога синот Божји со сопствениот живот го спасува човештвото:

– Нека овој голем ден внесе радост. Зраците од воскреснатиот Христос ги озарат сите христијани во целиот свет затоа што победата над смртта е во овие мигови кога Христос воскреснува, а кој што е гарант и за наше воскреснување. Оттука е и целата наша радост затоа што Христос со смрт смртта ја победи и на сите им подари живот вечен. Христос Воскресе!

Велигден на ист датум годинава го одбележуваат и католиците. По тој повод во сите католички храмови во светот се одржа полноќна миса. Велигденска миса  се одржа и во католичката црква  „Св. Бенедикт и Св. Кирил и Св.Методиј“ во Охрид.

Христос воскресе! Вистина воскресе!

За многу години.

OhridNews