Од први јули започнува програмата на овогодинешното 4-тото алтернативно културно-забавно лето „Културолошка иницијатива 5 до 12“ насловено како „ЗНАКОТ НА 4КАТА“. На програмата седум настани распределени во месеците јули и август, како дел од официјалната програма, а настаните кои се надвор од програмата ќе бидат реализирани подоцна информираат од од Културолошката иницијатива 5 до 12.
Годинава поради четвртото издание сѐ што ќе реализираме ќе биде во „знакот на 4-ката“ и тоа ќе се провлекува низ сите наши настани. Одлучивме бројот 4 да го симболизира овогодинешното издание поради неколку работи. Првата поврзаност е секако тоа што годинава е 4-то издание, велат.
Бројот 4 има голема симболика во секојдневниот живот, а како најдобар пример се 4-те годишни времиња: пролет, лето, есен, зима коишто го прикажуваат циклусот на природата, но исто така го симболизираат циклусот на животот на човекот кој пак најчесто е претставен преку 4-те животни фази: растење, развивање, стареење и умирање кои го заокружуваат тој животен пат, а на секого во животот му е потребна ориентација која ја означуваат 4-те страни на светот: исток, запад, север, југ.
Ова лето ќе бидат претставени 4 важни поими кои ќе се главна одлика на четвртото издание, а тоа се: ментално здравје, креативност, исполнетост, себеизразување кои се важни одлики за карактерот во животот на секоја индивидуа, а особено за младите генерации.
Додаваат дека бројот 4 е симбол на животот, а Културолошка иницијатива 5 до 12 е начин на живот. Ветуваат интересна програма за уживање на сите посетители, како домашни така и странски.
OhridNews
