Втора година по ред охриѓани и туристите ќе можат да уживаат во квалитетното вино, закуските и одличниот избор на музичките перформанси. Охридскиот фестивал на виното започнува на 22 јуни и ќе трае до 24 јуни. Потврдено е учество на преку 20 винарии од сите региони на земјата.

Градоначалникот на Охрид, Кирил Пецаков, на денешната прес-конференција по повод манифестацијата истакна дека со Вино фестот практично се означува и почетокот на летната туристичка сезона пред која претстојат безброј настани.

Оваа година за разлика од минатата кога Вино фестот го започнавме во септември и увидовме некои работи, одлучивме дека попрактично е да ја започнуваме сезоната со еден ваков фестивал, притоа добивајќи на квалитет, каде мислам на најдобрите македонски винарии, без исклучок, годинава збогатени и со винарии од сите региони во Македонија. Оваа година крајот на туристичката сезона ќе го означиме со Фестивалот на водата кој ќе се одржи последната недела од август. На овој начин ќе ги збогатуваме содржините што Охрид ги нуди, покрај традиционалните, за во текот на летото сите да уживаат и да привлекуваме голем број туристи, рече Пецаков.

Потенцираше дека остварени се контакти со винарии од Србија, Унгарија и други земји и ќе продолжат да работат на привлекување странски излагачи.

Се надевам дека оваа година како поширок спектар ќе одекнат позитивните критики кои ги имаме како Охридски вински фестивал и од година во година ќе расне и ќе добие многу поголем замав, а секако и поголема посетеност од страна на туристите, домашни и  странски. Во иднина очекуваме фестивалот да добие и интернационален предзнак. И би сакал да го задржиме овој фестивал да означува почеток на туристичката сезона, рече Пецаков.

Овогодинешната музичка програма, како што нагласи Пецаков е составена исклучиво од домашни изведувачи со што се дава поддршка на нашите квалитетни изведувачи.

Првиот ден е резервиран за бендот „Баклава“, Миле Кузманоски и Дарио. Во петок ќе настапат „Лугер“, „Брас брадрс“, „Бекдор бенд“, како и „Нокаут“, а во сабота охриѓанецот Александар Јосифоски, „Фитс анд инвизиблс“. Убеден сум дека музичката програма ќе ги задоволи сите вкусови на посетителите. Забавата секој ден ќе почнува околу 18 часот и ќе трае до еден часот по полноќ, рече Пецаков.

На годинешниот фестивал пред охриѓани и туристите во градот ќе се претстават добро познатите големи вински брендови и компании од земјата, како и некои од помалите семејни винарии.

Пане Темов од „Крафт Продукција“ истакна по релативно добри и ефтини цени ќе може да се пробааат различни видови на вина.

Интересот на нашите винарии е многу поголем од лани. Имаме посериозно учество на фестивалот и настанот ќе биде поголем. Традицијата не се создава за една, две години, за тоа е потребно време. Позитивна енергија од лани и зголемениот број учесници оваа година значи дека полека Охрид има шанса да стане вински центар, а Фестивалот во Охрид да стане реномиран саем на виното, рече Темов.

На фестивалот ќе бидат понудени многу бели сорти вина како темјаника, траминец, сувињон блан, шардоне, македонската сорта смедеревка, виоњер, ризлинг, ркацители и многу други. Љубителите на црвените вина пак ќе може да се пробаат многу голем број вински сорти, помеѓу кои несротливиот вранец, каберне сувињон, мерло, мускат отонел, пино ноар, шираз, картошија, каберне франк,станушина и други. Дополнителни ќе има розе вина, како и куве варијации и специјални рецепти на македонските винарии.

Охридскиот вински фестивал ќе се одржува на Кејот „Македонија“ на платото пред хотелот „Палас“. Фестивалот е организиран од „Крафт Продукција“, а под покровителство на Општина Охрид. 

Н.С.Ј.

видео. Б. Стојаноски