Владата на денешната седница го именува Владо Бучковски за специјален претставник за Бугарија, потврди за МИА владиниот портпарол Душко Арсовски.
Бучковски е универзитетски професор и поранешен премиер и министер за одбрана.
На именувањето на Бучковски за специјален претставник за Бугарија реагираше опозициската ВМРО ДПМНЕ. Според неа кадарот Владо Бучковски не е никаков скриен ас на Заев во преговорите, туку очаен обид да се најде жртва кому ќе се препише поразот на политиките на премиерот.
Назначувањето на Владо Бучковски е и потврда дека во СДСМ врие и на овој начин Заев преку доделување на функции се обидува да најде сојузници да ја зачува својата фотелја бидејќи со погубните политики не само што се доведува во прашање егзистенцијата на премиерското место туку и на претседателското во СДСМ. Наместо замајување на јавноста со стари и истрошени кадри Заев треба да одговори за што точно тајно преговара со бугарската влада овој викенд и дали е се тргува со историјата, јазикот, македонското малцинство идентитетот. Зошто Заев отфрли постигнување на национален консензус за ова прашање и зошто се плаши од национално единство во разговорите со Бугарија? – прашуват од ВМРО ДПМНЕ.
OhridNews
