На вчерашниот митинг кој го одржа СДСМ во Охрид, малубројните присутни граѓани, меѓу кои злоупотребени малолетни ученици кои го понесоа својот школски прибор,не само што согледаа дека константно се  залажувани со празни зборови и ветувања, туку им го согледаа и нивното лицемерно и  грдо управување со локалната самоуправа во изминативе години. Уништената гордост на градот, неуредените улици, хаосот со паркинзите,бизнисите со  зградите, уништување на зелените појаси,панаѓурскиот туризам- сето ова е всушност грдото лице на Охрид создадено од Петрески и СДСМ, рече на денешната прес- конференција портпаролот на ОК на ВМРО- ДПМНЕ, Никола Митровиќ.

– Кога се обидуваа да прават протести на кои ја мултиплицираа реалната бројност, зборуваа за бројки, кога видоа што е митинг на ВМРО ДПМНЕ зборуваат за градови. Нивната дезоориентираност се демонстира и преку тоа што на нивниот митинг не беше посочена ниту листа за кандидати за советници кои треба да бидат дел од советот на Општина Охрид. Дали причина што немаше листа е големото незадоволство во СДСМ од коалицијата со Народна, ЛДП и НСДП и што во првите седум места има само едно за членовите на СДСМ, дали причината е што месните организации на СДСМ не се консултирани за листата и листата е правена во координација само со централата во Скопје, додаде Митровиќ.

Тој праша дали причината е и што неколку видни Охриѓани на кои им било понудено да ја водат листата одбиле, свесни за поразот на СДСМ и Петрески во Охрид.

– Јасно е дека со ваквиот начин на појавување пред јавноста, Бранко Црвенковски и неговиот пулен  Александар Петрески заедно со неговиот долгогодишен губитнички тим, повторно ја манипулираат јавноста  и сакаат да добијат можност за уште четири години да можат да продолжат со нивниот деструктивен начин за уништување на Охрид, рече Митровиќ.

Како што потенцира портпаролот на ОК на ВМРО- ДПМНЕ,  граѓаните на Охрид нема да ја пропуштат долго очекуваната можност да стават крај на осум годишното измачување и уништување на градот.

Т. К.