Според податоците на Државниот завод за статистика, во 2010 година, во Република Македонија се родени вкупно 24 507 деца, од кои 24 296 се живородени. Бројот на живородените деца во 2010, во споредба со претходната година, е зголемен за 612 деца или за 2.6%. Во структурата според пол, кај живородените деца машките имаат поголемо учество и тоа 52.0%, односно на 100 живородени женски деца 108.3 се машки.
Во Охрид, во 2010 година, родени се еднаков број на женски и машки деца. Од вкупно 572 родени, 286 се машки и ист толкав број женски деца. Во Струга, од вкупно родени 695, машки биле 382, а женски 313.
Според возраста на мајката, најголемо учество, односно 60.8%, се живородени деца од мајки на возраст 20-29 години. Просечната возраст на мајката при вкупниот број на раѓања е 27.8 години, а 26.0 години на првите раѓања, што претставува благ пораст во однос на претходната година.
Генерациска година на раѓање на мајката која се појавува како најфреквентна при раѓањето на детето е 1982 година.
За одбележување е бројот на раѓања кај многу младото женско население. Во 2010 година се регистрирани 26 живородени деца од мајки на возраст под 15 години.
Бројот на вонбрачните живородени деца изнесува 2 958 деца или 12.2% од вкупниот број на живородени деца се вонбрачни.
