Во објавениот извештај на Транспаренси интернешенл за 2013 година, Македонија е на 67-то место според индексот на перцепција на корупцијата во 2013 година, што претставува подобро рангирање за две места во однос на минатата година.
Од земјите во регионот пред Македонија се Хрватска на 57 место, Турција на 53, Словенија на 43 место. Македонија го дели 67- то место со Црна Гора.
Повеќе корупција во регионот отколку во Македонија има во БиХ и Србија коишто ја делат 72. позиција, Бугарија е 77, Грција 80, Косово 111, а Албанија е на 116 место.
Од рангираните 177 држави, најмалку корупција има во Данска, Нов Зеланд и Финска, а најкорумпирани се Авганистан, Северна Кореја и Сомалија.
Транспаренси интеренешел констатира дека корупцијата останува сериозен проблем во светот. Апелира да бидат преземени глобални мерки против неа и појавите што ја поттикнуваат како што се перењето пари, нелегалното политичко финансирање и нетранспарентно работење на државните институции.
Индексот за перцепцијата на корупцијата се мери со скала од 0 до 100, а најмногу поени добиваат земјите каде што корупција е најмалку застапена, додека 0 добиваат најкорумпираните.
OhridNews
извор:Макфакс
