Во Република Македонија досега лабораториски не е потврден случај на заболен од западно-нилска треска, соопшти Комисијата за заштита на населението од заразни заболувања, по информациите дека вирусот се шири во соседните земји.
Од Институтот за јавно здравје информираа дека имаат обезбедено доволен број тестови за дијагностика на пациенти сомнителни за западно-нилска треска и дека годинава се испитани материјали од 25 сомнителни лица, а сите резултатите се негативни.
Остануваат на сила препораките за преземање превентивни мерки за заштита од вектор-преносливи болести, кои се пренесуваат преку комарци.
Да се постават заштитни мрежи на врати и прозорци, да се отстрани застоена вода од дворови, редовно чистење на олуците за да се овозможи истекување на водата, употреба на средства за заштита од каснување комарци.
Најчесто болеста поминува полесно без симптоми, а кај оние кај кои ќе се јават симптоми, истите се слични на грип, како што се покачена температура, изнемоштеност, болки по телото, може да се јават и гадење, повраќање и испип по телото.
Овие симптоми може да бидат резултат и на други респираторни заболувања и доколку почувствувате дел од овие симптоми, а сте каснат од комарец, пожелно е да се консултирате со матичниот лекар, советуваат од Институтот за јавно здравје.
извор:„Макфакс“
