Со богослужби и верски обичаи во Охрид и охридско денеска се одбележува празникот Успение на Пресвета Богородица, во народот познат уште и како Голема Богородица.
Утрово во црквата Св. Богородица – Каменско се одржа света архиерејска литургија на која чиноначалствуваше митрополитот Дебарско – кичесвки г. Тимотеј.
По повод празникот кај црквата посветена на Богородица во Скребатно денеска се одржува голем црковно народен собир на кој присуствуваат неколку илјади верници. И годинава, според традицијата, се одржа наддавање за светиот крст,средствата собрани од наддавачите ќе бидат искористени за надградба и одржување на светиот храм и излетничкото место.
Веќе петнаесетина години црковните одбори во кои членуваат повеќе истакнати граѓани по потекло од скребатскиот крај трпеливо го надградуваат црковното место кое од година во година привлекува се поголем број постители. Црквата целосно е возобновена пред 5 години на темелите на стариот храм, кој со точност не се знае од кога потекнува. Скребатно за прв пат во пишан документ се спомнува во 1583 година.
На темелите на вековната традиција денешните генерации не само што ја чуваат верата и обичаите туку претставуваат и вистински пример како треба да се сака и надградува едно свето место.
