Во текот на втората недела од 2026 година (05.01-11.01.2026), во Македонија се пријавени 2.322 случаи на групни пријави за заболени од грип/заболувања слични на грип, 34,6% повеќе во споредба со претходната недела. Бројот на пријавени лица оваа недела споредено со втората недела од минатата сезона е зголемен за 2,2 пати. Во текот на втората недела, пријавената инциденца е над неделната граница за средна активност.
Во однос на возрасната дистрибуција, 1.378 лица се на возраст од 15-64 години, 369 се лица на возраст над 65 години, 316 се деца на возраст од 5-14 години, 259 – деца на возраст од 0-4 години. Највисока инциденца се регистрира кај децата на возраст од 0-4 години.
Заболените лица се пријавени од 25 ЦЈЗ/ПЕ: Скопје – 556, Тетово – 308, Куманово – 266, Охрид – 202, Прилеп – 127, Велес – 111, Кавадарци – 109, Штип – 95, Струмица и Битола – по 87 заболени, Дебар – 78, Гостивар – 71, Неготино – 54, Македонски Брод – 42, а во Кичево, Гевгелија, Свети Николе, Кочани, Виница, Крива Паланка, Кратово, Струга, Валандово, Пробиштип и Радовиш, бројот на заболени е помал од 30.
Во пет ЦЈЗ/ПЕ, меѓу нив Дебар, Охрид, Македонски Брод, Кавадарци и Неготино, се бележи многу висока активност, во четири како Велес, Тетово, Куманово и Штип – висока активност, средна активност се регистрира во шест ЦЈЗ/ПЕ, во седум се бележи сезонска активност, додека во три единици се бележи многу ниска активност на вирусот на грип, посочуваат од Институтот за јавно здравје.
Д-р Драган Кочински од Институтот за јавно здравје посочува дека бројките на ниво на целата територија се очекувани за овој период од годината.
Засега сме во една средна активност што не дава можност да даваме претерени мерки како продолжување на зимскиот распуст. Ја следиме состојбата и ако има било какава промена ќе дадеме соодветни мерки. Пикот се очекува на крајот на јануари и до средината на февруари, вели Кочински.
Н.С.Ј.
