Во текот на првата недела од 2026 година (29.12.2025 – 04.01.2026), во Македонија се пријавени 1.725 случаи на групни пријави за заболени од грип/заболувања слични на грип, 2,2 пати повеќе во споредба со претходната недела, инфрмираат од Институтот за јавно здравје.
Бројот на пријавени лица оваа недела споредено со првата недела од минатата сезона е зголемен за 5,2 пати, а во споредба со бројот за првата недела од типичната епидемиска крива зголемен е за 38,7%.
Откако во текот на минатата недела (52-ра недела/2025) беше надмината границата за влез во сезона на грип во текот на првата недела од 2026 година, пријавената инциденца е над неделната граница на средна активност на вирусот на грип на национално ниво.
Во однос на возрасната дистрибуција, 749 лица се на возраст од 15-64 години, 618 – деца на возраст од 5-14 години, 229 – деца на возраст од 0-4 години и 129 се лица на возраст над 65 години.
Највисока инциденца се регистрира кај децата на возраст од 5-14 години.
Заболените лица се пријавени од 18 ЦЈЗ/ПЕ: Скопје – 716, Тетово – 339, Куманово – 150, Велес – 109, Штип – 60, Дебар – 54, Гостивар – 49, Прилеп- 45, Охрид – 44, Битола – 40, Струмица – 38, а во Кавадарци, Неготино, Струга, Демир Хисар, Виница, Македонски Брод и Радовиш, бројот на заболени е помал од 30.
Директорката на Институтот за јавно здравје Марија Андоновска денес посочи дека пикот се очекува со почетокот на второто полугодие од учебната 2025/2026 година и првата половина од февруари. Препорачува граѓаните да избегнуваат собири, да се избегнува контакт со заболени или луѓе со симптоми на кивање и кашлање, да се проветруваат просториите, да се почитуваат здрави животни стилови, а заболените да се јават на матичен лекар и да останат дома.
OhridNews
