– Ние имаме сосема прикладни цени за вакви објекти на прва линија, со нормално сместување во хотели со 4 или 5 ѕвезди. Цените навистина се прифатливи за тие што имаат пари и што сакаат Охрид да го видат, а тие што имаат помалку пари и сакаат други дестинации во странство има и такви можности кои луѓето ги користат, вели Перо Кутаноски-главен менаџер во х. „Гранит“.
Како причини за слабата посетеност на Охрид, Кутаноски ја наведува и лошата инфраструктура како и неискористениот аеродром, каде во моментов слетува само еден чартер авион неделно.
-Нас во текот на туристичката сезона ни фалат два до три чартер авиони од странство со што би ги пополниле хотелските капацитети. Се надевам дека тоа ќе се случи и веќе од наредната година ќе биде подобро, додава Кутаноски.
Најголем дел од туристите на ривиерата оваа година се млади кои најчесто се сместуваат во некој од илјадниците викенд станови изградени во последните петнаесетина години. Нивната платежна моќ е многу мала, што најдиректно го чувствуваат угостителите, според кои, годинешната е една од најлошите сезони на охридскиот туризам.
– Како прво на Охрид му фали стратегија за развој на туризмот. Нема насочување кон одреден вид туризам, измешани се многу работи, така да од сите песимистички очекувања што беа за оваа сезона испадна уште полошо. Треба да се преземат конкретни активности за наредната сезсона инаку ќе доживееме тотално фијско во туризмот, вели Александар Силјаноски, косопственик на кафе-пабот „Кастело“.
Туристичките работници се надеваат дека економската криза го достигна максимумот и дека со подобро организирана и поагресивна промоција на странскиот пазар, догодина Охрид ќе има многу подобра летна сезона.
