Во последните 5 години не е регистрирано ниту едно лице во охридскиот регион, кое е заболено од ХИВ вирусот. Оваа болест, последните децении е во пораст не само кај нас, туку и во светски рамки. Секоја година се организираат акции за поширока едукација на населението, а 1-ви декември е прогласен за Светски ден за борба против СИДА.
Во Охрид на овој ден ќе се спроведува акција, при што граѓаните ќе имаат можност да се тестираат анонимно и бесплатно за да го дознаат својот хив статус. Организатор на оваа акција е Црвениот Крст од Охрид и НВО опцијата. „На градскиот плоштад по повод овој светски ден, на 1-ви декември граѓаните ќе можат да се тестираат бесплатно и анонимно. Волонтерите на нашата здравствена организација ќе делат едукативни материјали, како и презервативи кои се основното заштитно средство за спречување на ширењето на болеста.“ – вели Младен Божиноски, младински координатор во Црвен Крст- Охрид.
Јулијана Настоска од НВО „Опција“, истакнува дека нивната организација се приклучува кон активностите.
– Во нашите простории во дневниот центар, планираме да одржиме едукативни работилници. Со тоа, нашите целни групи ќе можат подетално да се информираат за начинот на пренос и заштита од оваа болест, потенцира Настоска.
Во текот на наредната седмица во сорабтока со сојузот на студенти, во просториите на Факултетот за туризам и угостителство, ќе бидат отворени и штандови на кои ќе се делат едукативни флаери.
– Во соработка со НВО од Охрид, студентите ќе се информираат за нашиот начин на работа. Ќе бидат презентирани мерките за заштита и превенција, а исто така посетителите ќе се запознаат со ДСТ(бесплатно анонимно тестирање) за оваа болест. Во образовните институции ќе се реализираат отворени работилници, а од наредната година планираме во рамките на Црвениот Крст да функционира советувалиште за тестирање на хив статусот, додава Божиноски.
Според д-р Јованка Стурлакова – Коровешовска, постојат неколку начини на пренос на ХИВ вирусот.
– Ова вирусно заболување може да се пренесе преку незаштитени полови односи, преку крв, а се пренесува и од мајка на дете со доење, вели д-р Стурлакова Коровешовска.
Во Македонија регистрирани се вкупно 166 случаи, од кои 43 се носителие на вирусот, а 123 се заболени.