Судскиот процес за убиството на српскиот турист Дејан Новаковиќ, кој настрада во тепачка што минатиот август се случи во центарот на Охрид, ќе започне од почеток денеска во Основниот суд во Прилеп. До префрлање на судењето во Прилеп дојде откако претседателот на охридскиот основен суд, Владо Дејаноски, донесе одлука за изземање на Кривичниот совет предводен од судијката Милка Танеска, поради пропусти во постапката. Со искази се изземаа и другите кривични судии, по што надлежниот Апелациски суд во Битола предметот го предаде на Основниот суд во Прилеп. Согласно законот судењето ќе почне од почеток, а за да се надополни загубеното време закажани се уште три рочишта на 4, 5 и 6-ти мај.
Покрај судот, од процесот изземено е и основното јавно обвинителство во Охрид, кое го изготви обвинителниот акт. Нивната работа ја презеде прилепското обвинителство.
За смртта на 34-годишниот белграѓанец се обвинети Митре К. и Илче Ј., двајцата од Охрид, кои се товарат за кривично дело свирепо убиство. За истото дело е обвинет и српскиот државјанин Драган Ѓ., кој сеуште е во бегство. Четвртиот обвинет е Ѓоко Н. кој се товари за помагање по извршено кривично дело.
Пред да биде изземен, во Основниот суд во Охрид се одржаа две рочишта од судскиот процес за убиството на Дејан Новаковиќ, кој сега ќе почне од ново.
OhridNews
