Во Струга шест од деветмината кандидати за градоначалник денес потпишаа Кодекс за фер и демократски избори во просториите на Општинската изборна комисија.
Арсим Далипи од Националната алијанса за интеграција предводена од ДУИ, Љубе Петревски од Работничката партија, Роберт Милески од Демократи Скопје и независните кандидати Насто Палиоски, Менди Ќира и Игор Малески го потпишаа Кодексот, додека Јована Мојсоска од Левица и независните Бесник Асани и Мирко Савески не присуствуваа на потпишувањето.
Поголем дел од кандидатите се надеваат на позитивна, цивилизирана, демократска кампања и фер изборен процес.
- Ние сме тие што треба да испратиме позитивна порака дека граѓаните на општина Струга бараат поинаква кампања, поинакво менаџирање и заслужуваат повеќе. Сите кандидати и политички партии треба да се воздржуваат од клевети и било што што ќе им наштети на стружани и на кампањата, рече Ќира.
- Пред се ние сме сограѓани, сме живееле и ќе живееме тука и после изборите. Како што и доликува на Струга да го покажеме тоа во тек на кампањата и во целиот изборен процес, изјави Далипи.
- Се надевам на добра кампања, бидејќи Струга заслужува фер изборен процес во кој најдобриот треба да победи, нагласи Милески.
- Посакувам фер и демократска кампања без изборни измами и кражби, а го очекувам спротивното, изјави кандидатот на Работничката партија Петревски.
Независниот кандидат Палисоки се сомнева дека кампањата ќе биде фер и демократска, но остава тоа народот да го каже на крај.
На претстојните локални избори во Струга покрај деветте кандидати за градоначалник во трката за советници во Советот на Општина Струга се 10 листи, седум на политички партии и коалиции и три независни.
Н.С.Ј.
