Американскиот амбасадор во Македонија Пол Волерс, денес, оствари посета на Факултетот за туризам и угостителство каде одржа предавање за претприемништвото и можностите за развој на македонската економија. Волерс пред студентите и вработените на ФТУ ги презентира и можностите за работен престој во летниот период во Америка, преку програмите за размена на студенти и професори.


– Мило ми е што постои ваква размена на студенти и професори меѓу високообразовните институции од двете земји. Иако не ја знам точната бројка на студенти кои од Македонија заминуваат во САД, сепак знам дека секоја година има неколку стотици кои се решаваат на ваков чекор. Би им препорачал да одат во Америка, да заработат пари и да се вратат назад и го пренесат тоа како искуство во сопствената земја, рече амбасадорот Волерс.

Како што објасни деканот на ФТУ проф. Д- р Сашо Коруновски, факултетот веќе 15 години е член на Асоцијацијата на колеџи во САД, со што се овозможува размената на студенти и професори. Потенцира дека неколкумесечниот престој на студентите од Македонија во САД е особено значајно искуство за нив.
–  На оние студенти кои заминуваат во САД факултетот им го признава престојот како пракса и дел од студиската програма. Тоа за студентите е двојна добивка- можност за заработка и стекнување пракса, изјави деканот Коруновски.


Ректорот на Универзитетот „Св. Климент Охридски“- Битола, Златко Жоглев,  со совет до студентите кои имаат намера за студиски престој во САД- по престојот да се вратат во матичната земја  со цел да дадат придонес кон нејзиниот развој.

– Секој може да оди секаде, но никаде не е како дома. Каде и да оди студентот, тој ќе биди доселеник, без разлика какви квалитети поседува. Ако сите студенти се вратат во нашата држава, веруваме дека ќе дадат придонес за понатамошен развој на нашата држава, рече ректорот Жоглев.


Соработката меѓу ФТУ и амбасадата на САД продолжува и  во наредниот период. Во рамки на заедничкиот проект со амбасадата ќе биде отворен и американски центар во ФТУ, а во месец април американски експерти од областа на туризмот ќе престојуваат на охридскиот факултет, од каде истовремено предавањата ќе може да ги следат студентите во Охрид и во САД.

Т. Кувенџиска
фото:Емилио