Во Домот на поезијата во Струга, утре вечер со почеток во 20 часот, ќе бидат врачени наградите “Јован Котески” и “Крсте Чачански”.
Добитници на годинашните награди се: Трајче Кацаров за поетската книга “Форма на молкот” е добитник на наградата “Јован Котески”, а Христо Петрески за книгата раскази “Пирамида. Лавиринт” е добитник на наградата “Крсте Чачански”.
Беседа за животот и делото на Јован Котески и Крсте Чачански ќе одржи Тоде Илиески, а за наградените дела на Кацаров и Петрески ќе говорат Светлана Христова Јоциќ и Мерсиха Исмајлоска.
Наградите ќе ги врачи Петко Шипинкаровски, претседател на Здружението за литература, култура и наука “Бран 2010” и списанието “Бранувања” од Струга, кои го распишуваат Конкурсот за најдобри необјавени поетски и прозни книги од македонски автори и ги доделуваат двете значајни републички признанија – наградите “Јован Котески” и “Крсте Чачански”.
