Вниманието на навивачите на МЗТ Скопје и македонската јавност ќе биде фокусирано кон американецот Брендон Вуд кој е кошаркарот кој треба да му даде тон на играта на металците. Вели дека е одлично прифатен од сите во клубот и дека подршката која ја добива ќе ја возврати со добри игри на паркетот.


– Уште од првиот ден тимот, тренерот и управата ме прифатија одлично како дел од фамилијата  и за еден играч кој доаѓа од далеку од САД како мене сигурно дека тоа е многу важно. Се чувстувам добредојден, и тоа ми дава дополнителна волја и желба да го покажам мојот квалитет – се првите импресии на амреиканскиот плеј, кој со тимот се подготвува во Охрид.

Ова е прво клупско искуство за Вуд надвор од САД. Со тимот на МЗТ посакува прво да го повтори ланскиот успех , но и да направи чекор напред во Јадранската лига.

–  Како дел од проектот “атлети во акција“ сум бил во Полска и Германија, но тоа е по 2-3 недели, додека ова ќе трае осум месеци. Ова е за мене прво вакво искуство , завшршив лани во Мичиген колеџот.  Знам дека МЗТ лани го освои шампионатот, ова ќе биде прва сезона во Јадранската лига, слушнав дека ќе биде тоа добра можност за одигрување на добри натпревари,сигурно дека ке се обидеме да победиме секого, но ќе биде важно во оваа година да видиме до каде сме и каде е нашето место во таа лига – вели Вуд.

Тимот на МЗТ на првиот тренинг имаше  “жежок“ пречек од страна на навивачката група “Фемили“. Натпреварите на “металците“ се играат пред полните трибини, а Вуд очекува да им донесе уште повеќе причини за радост на следбениците на овој клуб.

–    Гледав видеа на “Јутјуб“ пред да дојдам , но ова што го видов на лице место е навистина неверојатно, нешто што досега го немав видено. Навивачите не бодреа на тренингот, и морам да признаам дека беа во подобра форма од нас во моментов. Но кога имаш таква публика во грбот секако дека тоа е мотив повеќе и јас  ќе направам се да извојуваме што повеќе победи и заеднички да ги славиме – рече Вуд.


Не познава многу од македонските кошаркари, слушнал за Лестер Бо Мекејлеб, а посакува да го надмине во неговите постигнувања и еден ден да заигра во НБА лигата.

–    Не знам многу за него, од она што го слушнав е дека е доста успешен. Секако дека сакам да го повторам неговиот успех, но и да ги надиминам тие постигнувања. Мојата цел е НБА, желба на секој американец е да заигра во професионалната лига, дали тоа ќе биде за година, две три,не е важно тоа останува моја цел – завршува Вуд.
фото Емилио
М.П.