Екипи на Заводот и Музеј Охрид, денеска започнаа со истражувања на два археолошки локалитети во Љубанишко поле.
– Според археолошките показатели на теренот, во атарот на селото Љубаништа приоритет за истражување имаат две локации со остатоци од градежни структури. Едната е именувана како „Раица“, лоцирана на источниот крак од планинскиот опфат, во близината на автокампот Љубаништа. Со сондажните археолошки истражувања во седумдесетите години на минатиот век евидентиран е ранохристијански црковен објект со поден мозаик, кој во релација со откриените сакрални објекти на Плаошник, Манчевци и Чобановци – во централното градско подрачје на Охрид, Студенчишта и Св. Еразмо, лоцирани на двата спротивни влеза во Охрид, може да се каже дека датира од V – VI век. Тоа е времето кога Лихнидус (Охрид) претставувал значаен епископски центар во ранохристијанската екумена.-информираат од Завод и Музеј.
Со оглед на тоа што самата локација се наоѓа во близина на бронзенодопската палафитна населба во Заливот на коските, археолозите очекуваат материјални докази со постара хронологија.
– Истражувањето и соодветниот третман на локалитетот „Раица“ би претставувал значаен придонес во археолошката карта на Охридскиот регион, Република Македонија, како и во рамките на светско културно наследство.-сметаат во охридскиот Завод и Музеј.
Втората археолошка локација е во близина на источниот пристап на комплексот Св. Наум. Таму биле евидентирани остатоци од средновековната црква Св. Богородица.
– Истражувачките активности на овие две локации се неопходна етапа во изработка на Заштитно-конзерваторските основи за Урбанистичко-планската документација на Туристичката развојна зона „Љубаништа“, КО Љубаништа – Општина Охрид, кои се спроведуваат во согласност со Министерството за култура на Република Македонија. За таа цел издвоени се средства во висина од 300.000 денари.-велат до Завод и Музеј.
Истражувањето на посочените археолошки локалитети се од исклучитено научно и историско значење, дотолку повеќе што просторот кај Љубанишко поле се спомнува во амбициозните планови на индискиот бизнисмен Субрата Рој кој таму сака да гради луксузен туристички комплекс.
Горан Момироски
