Од сабота во земјава започнува долгонајавуваната дигитализација, а програмите на македонските телевизии ќе добијат поквалитетен тон и слика, уверуваат надлежните институции.
Оние со постари телевизори кои немаат дигитален приемник или не се приклучени кон кабелските оператори, нема да можат да ги следат програмите, додека оние кои користат обична антена се очекува да ги почувствуваат бенефитите од дигитализацијата.
Како што информираат надлежните, петте национални телевизии и една регионална веќе се поврзале на дигиталната платформа на „Оне“, кој го доби тендерот од страна на Агенцијата за електронски комуникации.
Според Министерот за информатичко општество и администрација, Иво Ивановски, преку оваа платформа се овозможува креирање нови работни места и се овозможува подобрување на медиумскиот сектор.
„Од една страна граѓаните ќе добиваат поквалитетна слика, а од друга страна медиумите ќе можат да прикажуваат повеќе и поразлични програми.“ – истакна Ивановски.
Директорот на АЕК, Роберт Ордановски, истакна дека со новиот сигнал кој е отпорен на секакви влијанија се добива екстремно подобар квалитет.
Од Советот за радиодифузија и од АЕК ги советуваат граѓаните кај кои ќе има лош квалитет на сликата да пријават во надлежните институции за проблемот да биде отстранет.
Инаку, Македонија е првата земја во регионот која ќе го исклучи аналогниот сигнал.
OhridNews
