Националната установа ,,Завод за заштита на спомениците на културата и музеј’’ од Охрид во иднина ќе го реши проблемот со недостатокот на стручен кадар со кој се соочуваше подолго време. Министерството за финансии конечно даде зелено светло за вработување на 10 лица на неопределено работно време на повеќе работни позиции.
Според јавниот оглас кој ќе биде затворен утре, во оваа Национална установа ќе бидат вработени стручни работници за праисториска археологија и протоисторија, за класична и средновековна археологија и за заштита на сакрална архитектура. Исто така со овој оглас се очекува да се вработат стручни работници за урбанизација и изготвување на заштитно конзерваторски основи, за заштита на хартија, за заштита на камен и керамика, за заштита на фрескоживопис, како и препаратор за заштита на дела од метал и ноќен чувар.
Директорката на Завод и музеј, Тања Паскали Бунташеска вели дека со вработувањето на овие стручни лица ќе се зголеми продуктивноста и квалитетот на функционирање на оваа установа.
-Овие вработувања ни беа многу потребни. Со нив ќе се доекипираме и ќе можеме успешно да одговориме на сите работни обврски кои се предвидени со планот и програмата за работа на нашата установа, вели Бунташеска.
Заинтересираните кандидати за вработување освен општите услови од Законот за работни односи потребно е да ги исполнуваат и посебните услови кои се пропишани во огласот. Изборот на кандидатите ќе се изврши во рок до 7 дена од завршувањето на огласот.
Е.М
