Градоначалникот Никола Бакрачески денес, придружуван од претставници од стручните служби во локалната самоуправа и месната заедница, изврши увид во Пештани врз градежните активности кои се во тек.
– Од она што можев да го видам на терен задоволен сум од текот на изведување на работите. Можете да видите дека завршува проектот за уредување на кејот, потпорниот ѕид е изграден, следуваат активности за уредување на инфраструктурата и хортикултурно уредување со што Пештани ќе добие убаво уредено шеталиште покрај езерото, рече Бакрачески.
Задоволство од извршените зафати искажаа и од месната заедница, од каде се надеваат дека локалната самоуправа ќе помогне во решавање и на останатите проблеми со кои се соочуваат жителите.
– Задоволни сме од изградбата на потпорниот ѕид, одамна ова го баравме поради поплавите кои се случуваа. Очекуваме и повеќе од локалната самоуправа, да се уреди плажата во Пештани, да се обезбедат чамците, изјави Љубе Бубески од месната заедница.
Во изминатите месеци во Пештани се изврши и асфалтирање на улицата „Стевче Илоски“, а се уредуваат и две помали улички со цел Пештани подготвено да ја дочека претстојната туристичка сезона.
OhridNews
