Делегација на Здружението на инвалиди на трудот од Охрид деновиве оствари средба со градоначалникот Никола Бакрачески. Претседателот на здружението Благоја Крстаноски, секретарот Сребре Петроски и претседателката на активот на жени инвалиди на трудот Ленче Филческа, на средбата го запознале градоначалникот со планот и програмата за работа на здружението и проблемите со кои тоа се соочува.
Најголем проблем на здружението се просториите за работа, исто така била истакната потребата од помош при реализација на активностите и учество на манифестации, спортски игри и екскурзии, а станало збор и за поддршка на хуманитарните проекти за помош на болниците во Демир Капија, Бардовци, Банско и др. центри. На средбата се разговарало и за субвенционирање на трошоците за одредени јавни давачки, бесплатен градски превоз за пензионирани инвалиди на трудот, бесплатна правна помош и друго.
Од градоначалникот Бакрачески претставниците на Здружението на инвалиди на трудот Охрид, кое брои 1800 члена, добиле ветување дека локалната самоуправа во рамки на своите можности ќе ги помага активностите на здружението.
