Земјоделците ќе поднесуваат барања за субвенции до крајот на јули

Земјоделците кои сакаат да аплцираат за субвенции, наместо до утре, 20-ти јуни 2012 година, ќе може да ги поднесуваат своите барања заклучно до 31 јули. Како што информираат од Министерството за земјоделство шумарство и водостопанство, пролонгирањето на рокот за аплицирање било донесено со владина уредба, на предлог на Министерството, по барање на здруженијата на земјоделци.

-Земјоделците побараа продолжување на рокот за поднесување барања по Програмата поради воведувањето нов систем на администрирање на директните плаќања во Република Македонија. Во насока на воспоставување Интегриран систем за администрација и контрола, се изврши интегрирање на софтверот за директни плаќања со софтверот на Единствениот регистар на земјоделски стопанства, при што се овозможи значајно намалување на документите кои барателите ги доставуваат во прилог на барањата,  информираат од Министерството за земјоделство шумарство и водостопанство.

Продолжениот рок за поднесување на барањата за субвенции ќе придонесе за целосен опфат на земјоделските стопанства во процесот на поднесување на барања.