Според статистичките податоци на операторот на македонските аеродроми „Александар Велики“ Скопје и „Св. Апостол Павле“ – Охрид, „ТАВ Македонија“, во август споредено со истиот месец минатата година, бројот на превезени патници преку двата аеродроми се зголемил за 20,5%.
Охридскиот аеродром го користеле 16.463 патници,а преку скопскиот патувале 115.023 патници.
Во текот на првите осум месеци од 2013 година во споредба со претходната година има зголемување на бројот на патници од 17.5 проценти со вкупно 732.831 превезени патници. Зголемен е и бројот на летови, односно движења на воздухоплови. Од јануари до август биле реализирани 8.489 операции на воздухоплови што е зголемување од 9.9 отсто во споредба со истиот период од 2012 година. Во август, пак, има значително зголемување од дури 16.2 проценти во споредба со истиот месец минатата година.
– Зголемувањето на бројките се должи на воведувањето повеќе фреквенции неделно од страна на „Туркиш ерлајнс“, „Аустриан ерлајнс“, „Кроација ерлајнс“ и „Флај Дубаи“. Дополнително, во текот на летната сезона неколкупати неделно имаше летови до туристичките дестинации Анталија и Измир во Турција со авиокомпаниите „Корендон“ и „Сан експрес“, како и неколку чартер-летови до Катанија, Сицилија. Патниците и понатаму покажуваат особен интерес за линиите на „Визер“, велат од ТАВ Македонија.
Најпопуларни дестинации од скопскиот аеродром во август биле Истанбул, Виена, Цирих, Лондон и Малме. Помеѓу јануари и август, пак, петте најпопуларни дестинации се Истанбул, Виена, Цирих, Лондон и Љубљана. Најмногу патници патувале со „Визер“, „Туркиш ерлајнс“, „Аустриан ерлајнс“, „Адриа ервејс“ и „Пегасус ерлајнс“.
