Во знак на поддршка на лицата со аутизам, а по повод Светскиот ден на свесноста за аутизмот – 2 Април, синоќа во сина боја беше осветлена зградата на Општина Охрид.
Сината боја е заштитен знак за грижата на лицата со аутизам и потсетник за зголемување на јавната свест за инклузија на овие лица во општественото живеење.
Втори април се одбележува како светски ден од 2008 година. Воведен е со одлука на Генералното собрание на ОН, а Македонија се вклучи во одбележувањето од 2010 година. Датумот 2 Април е избран во 2007 година од страна на Генералното Собрание на Обединетите Нации, со цел да се сврти светското внимание кон аутизмот како растечки глобален здравствен проблем.
Според поновите податоци од стручната фела бројката на лица во Македонија со аутизам значително се зголемува. Посочуваат дека потребни се коренити промени во пристапот кон лицата со аутизам, како во поглед на здравството, образованието, едукацијата на луѓето вклучени во оваа проблематика, но и свеста кај околината.
Меѓу проблеми се и немањето адекватни центри за дијагностика и рехабилитација, но и Национален регистар, како и спроведување одредени методи кои се покажале доста корисни во светот.
Н.С.Ј.
