Барање за отстранување на нелегално поставени препреки на јавни површини во Стар Град понесоа жителите од овој дел до локалната самоуправа и СВР Охрид.
Во барањето апелираат за итна реакција и соодветна примена на постојните закони, правилници и прописи кои се однесуваат на користење и зафаќање на јавниот простор со посебен акцент на улиците во Стар Град Охрид.
Во изминатиот период се почесто се појавуваат физички препреки како што се пластични гајби, метални столпчиња, бетонски блокови, рази конструкции прикачени на фасади и други импровизирани објекти со кои се блокираат и узурпираат јавни паркинг места и делови од улици. Овие објекти се поставуваат нелегално и самоволно, најчесто со цел приватно користење на јавен простор, што е спротивно на Законот за уредување на прсторот, Законот за безбедност во сообраќајот и прописите за комунален ред, потенцираат.
Со тоа, велат, не само што се нарушува јавниот интерес, туку се ограничува и правото на слободно движење, паркирање и пристап до јавна површина за сите граѓани.
Жителите бараат да се спроведе инспекциски надзор од надлежните општински служби и МВР, да се отстраната сите нелегално поставени препреки и конструкции на јавните улици и паркинг простори, да се изречат соодветни казненени мерки и да се информира јавноста за преземените мерки и за планот за зачувување на јавниот ред и пристапност во Стар Град.
OhridNews
