Вкупно 6,23 милијарди денари или околу 113 милиони евра ќе бидат издвоени од Буџетот на Република Македонија за 2012 година. Според Програмата за финансиска поддршка на земјоделството, субвенциите се поголеми од лани за 12 %, а од нив најмногу ќе може да се офајдат сточарите и градинарите.
Програмата содржи вкупно 37 мерки. Од проектираните средства, 3,49 милијарди денари се за растително производство, 2,3 милијарди се наменети за сточарството, а 130 милиони денари се за органско производство.
-Додадени се и нови мерки, во сточарството дополнително субвенционирање за задржување женски грла со цел зголемување на основните стада, а во градинарството првпат се прави категоризација по одделни култури врз основа на четири критериуми, цената на семенскиот материјал, технолошката интензивност, трудоинтензивноста и учеството на производот во извозот, стои во објавата на веб страницата на Министерството за земјоделство шумарство и водостопанство.
Во него се појаснува дека посебна категоризација има и во преработувачката индустрија, а во овоштарството, за првпат се воведуваат субвенции за предадено овошје во индустриските капацитети и за произведени јагоди во затворен простор.
Исто така се зголемува и поддршката во делот производството и употребата на сертифицираното семе и саден материјал, како и во производството на сточна храна и пченка.
-За хектар пченица, рж, јачмен, пченка, ориз, овес, сирак, просо, хмељ, леќа, кикирики, соја, сончоглед, маслодајна репа, афион, шеќерна репа, памук, граор, засеана или одржувана површина се предвидени 9 илјади денари или шест отсто повеќе, дополнителни илјада денари за хектар сточна храна или пченка, за сончоглед и ориз плус 3 илјади денари, 50 отсто повеќе за домати и краставици и 15 процентно зголемување за пипер и компир, пишува меѓу другото во објавата.
Зголемување од 15 на 25 денари или 67 отсто има за продаден лозов и овошен сертифицран, безвирусен саден материјал кој очеуваме да овозможи зголемени и здрави приноси, за четири проценти се зголемуваат субвенциите за обележани грла говеда, а се воведува и мерката со која се даваат по илјада и петстотини денари за обележано женско грло. Планирана е и дополнителна поддршка од 2 илјади денари за заклано грло говедо одгледувано од октовмри 2011 до април 2012. За обележани грла овци поддршката се зголемува за пет отсто, но, се воведуваат и нови 700денари за женско јагне.
