Струшкиот суд, попладнево, на Исмаил Асани од Струга, му изрече максимална казна од 15 години затвор поради убиството на Џемаил Исмаили , како и за обид за ликвидација на неговиот син, Мефаил Исмаили, дописникот од Струга  за весникот “Коха е ре”. 

Асани е обвинет за три кривични дела-  убиство со умисла, убиство во обид и недозволено поседување огнено оружје. 

Исмаил Асани на 30-ти август минатата година, на главната крстосница во Струга на пресекот на  патиштата кон Ќафасан и Дебар, со пиштол го убил Џемаил Исмаили, а тешко го рани неговиот син Мефаил од Струшкото село Делогожда, кој пред судот тврдеше дека причина за убиството е нереализирана провизија од 30 до 60 илјади евра, договорена за продажба на куќата на неговиот вујко, во што според него бил вмешан и полициски службеник од Струга.

OhridNews