Илјадници граѓани дојдоа на прославата за 20-годишнината од независноста на Македонија во центарот на Скопје. Првиот парламентарец, Трајко Вељаноски ја изнесе оригиналната декларација за независност од 1991 година. Документот е преземен од страна на Гардата на АРМ и е пренесен до Музејот на македонската борба.
– Во името на идните генерации и аманетот кој ни го оставија сите оние, кои ги положија животите за денешна Македонија, да ја направиме нашата библиска земја уште подостојна за нивните жртви, уште повековита од нивните надежи и уште поубава од нивните соништа – рече Вељаноски во обраќањето пред присутните граѓани.
Низ портата „Македонија”, помина 1.000 деца, како симбол за иднината на Македонија.
Премиерот Никола Груевски во својот педесет минутен говор на централната прослава по повод 20-годишнината од независноста на Македонија повика на национално обединување со цел просперитет на државата.
– Во овие 20 години создадовме независна македонска држава. Поминавме и добро и лошо, конфликти и помирување, но покажавме дека различните култури можат заедно. Тој систем не е совршен, но ќе му помогне на секого да го најде своето место – рече Груевски.
По завршувањето на говорот на Премиерот, беше пуштена во употреба фонтаната во рамки на споменикот „Воин на коњ“, по што следуваше голем огномет и промоција на композицијата „Македонија“ на композиторот Кире Костов.
Ohridnews
