Опструкциите и критиките за процесот на лустрација доаѓаат од организирани центри кои се во функција на заштита на една лажна елита, која во минатото е создадена со лажење и кодошење на неистомислениците.
Ова се дел од констатациите на првиот човек на комисијата за верификација на фактите, Томе Аџиев, кој во последниот период, особено по обелоденувањата на значајни имиња од МАНУ, стана предмет на секојдневни критики.
Во саботното интервју за Прес24, Аџиев вели дека овие критики не ги чувствува како притисок, туку како големо разочарување, но и потврда на некои ставови и мислења, кои долго, долго, во јавноста лебдат дека “има нешто труло во (нивната) држава Данска”, пренесува „Макфакс“.
-На почетокот на мандатот, додека Комисијата се организираше, додека ги донесе актите и го воспостави системот на работа, од овие исти кругови беше критикувана зошто се уште нема резултати, за да сега, кога процесот влезе во целосна реализација, а особено кога на увид на јавноста почнаа да излегуваат имињата на некои “значајни” личности тие истите кренаа уште поголема прашина, вели Аџиев за Прес 24.
Аџиев вели токму, Чедомир Дамјановски, е задолжен за опструкција на работата на комисијата. Според него тој е двигател на сите реакции во јавноста.
За него е многу симптоматично, “како тоа Академијата и Друштвото на писателите на Македонија разбраа (или можеби знаеја) за кого се однесува нешто што воопшто не излезе во јавноста од Комисијата”, алудирајќи на досието на Славко Јаневски, по кое и се крена бурата.
„Дали некој почувствува и се препозна, дека сега кога ќе се отвори “пандорината кутија на кодошите”, следните, можеби тие се на дневен ред. Тоа не можам да го утврдам. Но факт е, дека тие го обелоденија тоа име, и го “предадоа на јавноста”. Доколку не беа толку себични и сурови, јавноста воопшто немаше да добие сознанија за таа личност, вели Аџиев.
Тој во интервјуто за Прес24 уверува дека комисијата нема селективен пристап и работи според законите.
OhridNews
извор: „Макфакс“
