– Тие бои се опасни затоа што создаваат одреден слој на површината на водата и спречуваат сончевите зраци да влегуваат подлабоко во водата, односно пречат на животинскиот свет. Овие материи биолошки се тешко разградливи, а некои и воопшто не се се разградливи, а некои од нив содржат и тешки метали. Сето ова е резултат на несоодветно ракување и затоа треба што поскоро да се изгради затворен објект каде пловните објекти би се носеле за поправки или бојадисување и сите отпадни води кои таму ќе се создаваат да се филтрираат и да се испуштаат во колекторскиот систем, додека амбалажата од средствата за бојадисување и заштита треба да се депонира посебно.-вели Ѓоко Зороски инженер по животна средина.
Покрај хемикалии, во езерото се излеваат и фекалии. Најсериозен проблем и натаму претставува нефункционалниот колектор. Жителите на населбата Воска алармираат дека веќе петти месец непречистените отпадни води наместо во колекторот се испуштаат директно во езерот.
– Ова е тешко кривично дело. Непречистените води од колекторот не одат во Струга во пречистителната станица туку се излеваат директно во Езерото. Доколку има правна држава, обвинител, истражни органи за ова некој треба да одговара, дали е тоа Груевски, Петрески или некој друг, одговорност мора да постои, резигнирано вели Тане Мојсоски –жител на населбата Воска.
Покрај загадувањето продолжува и узурпацијата на крајбрежјето со сечење и незаконско палење на трската и тампонирање на водните површини, а локалните моќници и градежни компании кројат нови планови за урбанизација на најатрактивните локации на езерскиот брег. Екологистите стравуваат дека доколку продолжи ваквиот неодговорен однос кон Охридското Езеро, овој природен бисер не само што ќе го изгуби својот сјај, туку може и неповратно да биде уништен, што ќе има далекусежни последици не само во туризмот и економскиот развој, туку и на квалитетот на животот во регионот.
