– Не е тешко да се согледа каква загуба трпевме ние превозниците години наназад. Тоа е неевидентиран промет, така што се работи и за загуби на државата на име неплатен данок, изјави Димитар Василевски, раководител на секторот за патнички сообраќај во АД „Галеб“ Охрид и член на Координативното тело на Здружението на превозници во патничкиот сообраќај „Исток“.
Во име на здружението, Василески искажа благодарност до Министерството за транспорт и врски, надлежниот инспекторат и другите одговорни институции за преземената акција, која како што посочи, индиректно ќе им помогне и на граѓаните оттаму што само на тој начин превозниците ќе можат да се справат со шокот предизвикан од растот на цената на нафата.
Тој истакна дека и во Охрид има сериозен проблем со нелојалната конкуренција, особено на линијата Охрид – Струга и меѓуградската линија кон Прилеп и Битола.
-Се надеваме дека акцијата ќе продолжи и натаму со несмален интензитет и дека согласно законот ќе се воведе ред во сферата на автопревозот, додаде Василески.
Здружението „Исток“ обединува 80 најголеми компании што се занимават со превоз на патници во Македонија.
