Амак СП ќе стане градски клуб

Достоинствена презентација во Европа, освоен трофеј во купот и елиминација во четвртфиналето од разигрувањето за титулата е учинокот во третата година од постоењето на охридскиот кошаркарски клуб Амак СП.

Чекор напред од претходниот беше желбата на стартот на шампионатот кога управата на клубот се одлучи да го оформи ростерот на екипата.

– При компонирањето на оваа екипа целта беше  солидна презентација во Европа. Одигравме четири натпревари во еврокуповите на кои достинствено го претставивме Охрид, Македонија и македонската кошарка – вели потпреседателот на клубот Христијан Шапкар.

Ритамот “езерџиите“ го издржаа до крајот на годината кога новогодишните празници ги дочекаа во самиот врв на табелата.

Следуваше економската криза која со себе ја повлече резултатска криза, по која  охрѓани се најдоа во слободен пад. Дојдоа натпреварите во националаниот куп. Охриѓани ја искористија предноста наречена домашен терен и со победите над МЗТ, Фени и Пелистер во финалето станаа  седмата  екипа која го освоила овиј трофеј, прв во историјата на клубот.

Сепак слободниот пад не застана тука, продолжи серијата порази , по која “белите“ го изгубија третото место и во пресрет на плеј – офот влегоа како четврото рангирани.

– По освојувањето на купот колата тргна низ брдо, резултатите не беа како што очекувавме, но и не кошаркарски мотиви како што беше “рецесијата“ не зафатија и нас по што се` се одрази на резултатите на клубот.

Во плеј – офот ги чекаше стариот познаник МЗТ Скопје. Серијата ја отворија со домашна победа, прва во плеј офф натпреварувањето. Не ја искористија првата меч топка на гостувањето во Скопје, по што се очекуваше работата да биде завршена во “Билјанини Извори“. Но не беше така, прв пораз од “штрковите“ во Охрид што значеше крај на сезоната. На двапати охриѓани имаа напад за победа кој не успеаа да го реализираат.

– Поразот од МЗТ е најтешкиот пораз кој го доживеав. Имавме одлична игра и голема предност, се уште не можам да се свестам од тој пораз. Очекувавме покрај трофејот во купот, пласман и во полуфиналето со што би ги исполниле зацртаните цели на стартот на сезоната. Кај нас постои задоволство од освоениот куп, но и разочарување од елиминацијата во плејофот, бидејќи очекувавме најмалку пласман во полуфиналето, вели Шапкар.

Во таборот на Амак-СП ќе направат дополнителна анализа не само на последниот меч туку и на целата сезона. Од охридскиот клуб велат дека засега е само сигурно дека и следната сезона Амак-СП ќе игра во Првата лига.

– Нема да дозволиме клубот да згасне. Амак ќе биде градски клуб. Сè уште е рано за повлекување на било какви потези, не знам што ќе биде следната сезона, но мислам дека клубот ќе се сврти кон поголема промоција на млади кошаркари – изјави Христијан Шапкар, вториот човек на Амак-СП.