Пред два дена целиот свет го славеше Денот на Европа, денот кога пред 62 години Европа веќе беше ослободена од конфликти. Сега во ЕУ како некои да ја забораваат вистинска причина зошто беше формирана ЕУ- тоа беше со цел да им се даде можност на народите да живеат во мир и просперитет. Ова го истакна амбасадорот на ЕУ во Македонија, Аиво Орав, кој учествуваше на денешната панел дискусија во Охрид на тема: “Европската интеграција како предизвик за културата на Македонија”.


– ЕУ денес е еден од најуспешните мировни проекти во целиот свет, а доказ за тоа се и вашата земја и многу други  кои сакат да станат член на Европската унија. Оваа дискусија е во рамки на активностите за одбележување на Денот на Европа и би сакал од охриѓани да научам нешто повеќе за тоа што тие мислат за процесот на проширување на ЕУ, како и за развојот на општина Охрид, рече амбасадорот Орав.

Во своето обраќање до амбасадорот, градоначалникот на општина Охрид, Александар Петрески, истакна дека Охрид со задоволство ги поддржува и учествува во организацијата на настаните поврзани со ЕУ и дека денешната панел дискусија е една од можностите за приближување на европските принципи до нашите граѓани, како и можност македонските културни вредности да  ја зголемат општата понуда на европскиот континент.


– Охрид и Македонија се наш и ваш дом, онака како што и ние чуствуваме дека обединета Европа е дом на сите народи кои учествуваат во чувањето на демократските вредности и градењето на заедничките демократски стандарди, рече градоначалникот Петрески.

На трибината учествуваа и проф. Д – р Милева Ѓуроска, претседател на на ЕДРМ, проф. Д – р Константин Миновски, генерален секретар на ЕДРМ, проф. Д – р Антонела Петкоска, како и бројни претставници на културниот и општествениот живот во Охрид и ученици.

Т. Кувенџиска