Американската војска објави договор вреден речиси милијарда долари за зголемување на производството на артилериска муниција од 155 милиметри, која Украина ја користи во големи количини.
Воените компании General Dynamics Ordnance&Tactical Systems и American Ordnance ќе се натпреваруваат за поединечни нарачки на муниција во рамките на договорот во вредност од 993,7 милиони долари, се наведува во соопштението на американската армија.
Целта е да се произведуваат меѓу 12.000 и 20.000 дополнителни артилериски гранати месечно, се додава.
Веста доаѓа откако војската на две други компании им додели договор од 522 милиони долари за купување муниција од истиот калибар како дел од механизмот за помош на Пентагон за Украина.
Руската инвазија врз Украина на 24 февруари 2022 година го потврди враќањето на конфликтот на суперсилите со голема употреба на артилериска муниција.
Во ноември, американски официјален претставник изјави дека руските сили истрелуваат околу 20.000 гранати дневно. Украина, од друга страна, истрелува меѓу 4.000 и 7.000 гранати дневно, што е повеќе отколку што западните производители на оружје можат да произведат.
Производството на артилериска муниција одзема многу време и брзо се троши.
Сепак, количината на муниција што ја користат Украина и Русија оттогаш се намали поради доаѓањето на зимата и недостигот што го чувствуваат двете земји.
OhridNews
