Дел од творештвото на Бетовен, Рахмањинов, Скрјабин отсвирено на пијано ќе имаат можност да слушнат љубителите на класичнта музика, кои вечерва ќе го проследат концертот на врвниот пијанист Андреј Коробејников од Русија, кој ќе се одржи во црквата Света Софија со почеток во 21 часот.
Според музичките критичари, овој руски пијанист е претставник на силната руска пијанистичка традиција. Дипломирал со највисоки почести на Московскиот конзерваториум на 19-годишна возраст, со што станал првиот музичар во историјата на оваа престижна руска школа кој го повторил успехот на композиторот и пијанист Сергеј Рахмањинов од 1892 година . Постдипломските студии ги завршува на Кралскиот музички колеџ во Лондон.
Како чудо од дете Коробејников својот прв солистички рецитал го остварува на 8-годишна возраст и од тогаш се стекнува со повеќе од 20 државни меѓународни награди. Концертирал во повеќе од 30 земји во светот и имал чест и привилегија да настапува со уметници од врвот на класичната музичка култура.
OhridNews
