Среде бел ден автомобил со кичевски ознаки заврши во предупредувачките бетонски ознаки од автопатот во изградба. Незгодата се случи вчера на влезот од Охрид и е само уште една во долгата статистика од почетокот на изградбата на автопатот Охрид – Кичево.
Од 2014 година амбициозно најавуваниот модерен автопат долг 57 километри никако да биде завршен. Се променија две влади и тројца премиери, без техничките, но изградбата на овој исклучително значаен инфраструктурен проект остана незавршена. Во меѓувреме потпишани беа и анекси на договорот со изведувачот, а цената на автопатот значително порасна.
Граѓаните се свесни за опасностите кои ги демнат на патот во изградба. Но, дел од вината за бројните незгоди гледаат и кај возачите, кои често не ги почитуваат сообраќајните знаци и правила. Особено кога е во прашање дозволената брзина на движење. На тоа укажуваат и резултатите од анкетата што изминатиот период за сопствени потреби ја спроверде OhridNews. Oд 1513 читатели вклучени во анкетата 31% сметаат дека условите и состојбата на патот не овозможуваат брзо возење.
Речиси да нема ден а сообраќајната полиција да не изрече дузина казни за непочитување на дозволената брзина или други прекршоци во сообраќајот. Но, очигледно тоа не е доволно. Потребни се подобри системски решенија, но и промени во свеста на учесниците во сообраќајот, а тоа може да се постигне само со добра едукација, издржани законски решенија, неселективна примена на законите кон прекршителите и подобрување на очајната патна инфраструктура која е меѓу најлошите на Балканот.
Г.М.
Следна анкета: Дали околу стариот Чинар, симболот на Охрид заштитен со закон, треба да има тезги?
