Пред сала преполна со публика, меѓу кои секако најбројни беа најмладите, членовите на Македонската опера и балет ја изведоја детската опера Јованче и Марика. Големиот интерес за претставата, која е заеднички проект на ЕВН Македонија и МОБ, е уште еден доказ дека охриѓани желно ги очекуваат ваквите настани кои, за разлика од главниот град на земјава, се вистинска реткост во останатите градови.
Вчерашната претстава беше проследена со вистинско уживање, а коментарите на родителите и децата беа во иднина вакви настани да се организираат што почесто.
Заедничкиот проект на ЕВН Македонија и Македонската опера и балет- бајката за братчето и сестричката го почна своето патување од Скопје. По двете изведби во главниот град, оваа опера ја видоа и децата од Куманово и Битола.
Гостувањето на грандиозната приказна за Јованче и Марика низ градовите е особено важно затоа што прв пат децата од земјава ќе можат да присуствуваат на оперска бајка во својот град, информираат од ЕВН.
OhridNews
