Во рамки на работниот престој во Народна Република Кина, градоначалникот Никола Бакрачески, ја посети најголемата кинеска и светска компанија за телекомуникациска опрема и ИТ технологии “Хуавеј“ каде оствари средба со менаџментот.
Оваа мултинационална и телекомуникациска компанија по обртот на производство ја престигна и компанијата Ериксон во 2012 година. “Хуавеј“ на почетокот од основање се фокусираше на изработка на опрема за телефони, а потоа компанијата го прошири својот бизнис градејќи своја телекомуникациска мрежа , обезбедување оперативни и консалтинг услуги и опрема за фирми во и надвор од Кина. Фирмата произведува различни уреди за комуникација за широка потрошувачка, а има на 140 000 вработени , од нив околу 46 % се ориентирани кон истражувачка дејност и развој.
При разгледувањето на компанијата, градоначалникот Бакрачески беше информиран дека фирмата “ Хуавеј“ има 21 институт за истражување и развој во Кина , Америка, Канада, Пакистан , Велика Британија, Франција, Германија, Колумбија, Шведска , Ирска, Индија, Русија и Турција. Во 2013 се инвестирани 5 милијарди американски долари за истражување и развој. Средбата беше заокружена со работна вечера на која градоначалникот Бакрачески пред менаџерскиот тим на “Хуавеј“ги појасни можностите,погодностите и олеснувањата што Владата на Република Македонија и Локалната самоуправа ги овозможуваат за влез на странски инвестиции. Бакрачески ги образложи и потенцијалите на градот за евентуален влез на овој гигант во Охрид.
Во рамки на работниот престој во Кина, градоначалникот Бакрачески го посети и еден од десетте административни дистрикти во Шенжен, градот Дапенг, едно од најпознатите туристички места во Кина.
OhridNews
