Бесплатен зимски одмор за 1000 деца од семејства со социјален ризик ќе обезбеди Министерството за труд и социјална политика. Според најавите зимувањето кое ќе биде организирано од 4-ти до 19-ти јануари 2014 година, вклучува шест дена активен одмор во Зимско рекреативниот центар на Пелистер со пет полни пансиони. Во рамки на одморот, децата ќе учат да скијаат и голем дел од времето ќе го поминат на организиран начин.
-Деновите ќе им бидат потполно организирани, согласно програмата изработена заедно со Министерството за образование и наука, појасни министерот за труд и социјална политика Диме Спасов, на отворената седница на Владата на Република Македонија.
Тој потенцираше дека средствата и условите за зимувањето се обезбедени, а утре ќе биде распишан јавен повик на кој ќе може да аплицираат сите заинтересирани семејства. Доколку децата имаат одредена попреченост, постои можност да имаат придружба од еден родител.
OhridNews
Извор: МИА
