-Надлежни за спроведување на оваа одлука се инспекциските служби. Тука треба да делува Комуналната инспекција и сите инспекции што се во подрачните единици на министерствата, како што е пазарната инспекција, трудовата инспекција, Дирекцијата за храна, меѓутоа очигледно тоа не функционира како што треба, вели Душко Јаковчески, претседател на Советот на општина Охрид.
Од општинскиот комунален инспекторат информираат дека постојано се на терен и дека нема ден, а да не поднеле пријава против некој од бројните прекршители, но не можеле сами да се справат со ситуацијата, затоа што не добивале поддршка од државните инспекции.
-Иако барамe и нудиме координација таа не постои. Единствено добиваме помош од полицијата која ни излегува во пресрет, додека другите инпсекции за жал како да се отсутни, а без нив тешко дека ние ќе можеме да се справиме со состојбата, затоа што секоја инспекција си има свои надлежности. Доколку и во иднина тие продолжат вака да се однесуваат тогаш се поставува прашањето зошто воопшто постојат инспекциите, изјави Танас Танасоски, раководител на општинскиот инспекторат.
И додека надлежните институции и инспекции не можат да се координираат, разните продавачи и препродавачи го завземаат секој слободен простор во центарот на Охрид и создаваат слика која не му доликува на најтуристичкиот град во земјата.
