Напредок со победата над Пелистер 1-0 се искачи на третата позиција во првата македонска фудбалска лига. На почеток од сезоната амбициите беа скромни за кичевскиот прволигаш, но како што одминува времето така избраниците на охриѓанецот Драган Бочески стануваат се посериозни кандидати за првите места на табелата.
– Мечот беше доста тежок. Двете екипи ја посакуваа победата од овој меч. Ние направивме се да постигнеме погодок и успеавме да прокнижиме три драгоцени бодови. Натпреварот против битолчани го одигравме некомплетни, но сепак фудбалерите кои добија прилика максимално ја искористија – потенцираше Драган Бочески.
До крајот на есенскиот дел од првенството Напредок го очекуваат дерби пресметки со Шкендија и Брегалница на гостински терен односно Металург и Работнички на градскиот стадион во Кичево.
Мх.П.
